Parkeringsløyve for forflyttingshemma

1. Søkjar kan ikkje gå i det heile tatt eller har store vanskar med å bevege seg over nokon lengde.

Gangevna og graden av forflytningshemminga skal dokumenterast gjennom legeerklæringa. Saksbehandlar vil sjå på legeerklæringa i samanheng med søkjarens eigen forklaring. Legen skal gjere ei sjølvstendig vurdering av søkjarens forflyttingsevne. Legeerklæringa må vere oppdatert, slik at den gir eit reelt bilete av gjeldande tilstand.

2. Søkjar må ha særleg behov for parkeringslette på konkrete stader.

Behovet for parkering må skildrast i søknadsskjemaet av søkjaren sjølv. Søkjar må skildre dei utfordringane ein har ved parkering på dei konkrete stadene ein har oppgitt. Dersom du har særleg behov for parkering i andre kommunar, skal også dette skildrast.

Kommunen vurderer om søkjar vil oppnå parkeringslette på stadene søkjar har angitt å ha behov for parkering ut frå den skildra forflyttingsevna.

Dersom det søkjast om parkeringsløyve som passasjer, må også eit tredje vilkår vere oppfylt:

3. Søkjar har behov for regelmessig hjelp av førar utanfor motorvogna.

Behovet for regelmessig hjelp vurderast med grunnlag i legeerklæringa og søkjarens forklaring. Det er berre dersom ein rørslehemma person ikkje kan etterlatast åleine eller saman med andre medan føraren parkerer på ein ordinær plass at dette vilkåret reknast som oppfylt.

Kommunen gjer ei heilskapleg vurdering av søkjarens behov for parkeringsløyve.

Parkeringsløyve er ikkje meint som ei økonomisk støtteordning. Kostnader knytt til bruk av motorvogn eller parkering vektleggast derfor ikkje ved vurdering av søknaden. Det vektleggast heller ikkje om søkjar mottar støtte til motorvogn, at ein har behov for gratis passering av bomring eller ønskje om fritak for piggdekkavgift.

Kommunen har ansvar for korrekt behandling av personopplysningar som gis i samband med søknad om parkeringsløyve for rørslehemma. Opplysningane som gis skal berre nyttast til dette føremålet og vil arkiverast i samsvar med arkivlova.

Ved innvilging av søknad vil nokre av opplysningane bli utlevert til Statens vegvesen, som er ansvarleg for eit sentralt register over parkeringsløyve for rørslehemma (HC-registeret).

Vedlegg til søknaden:

1.      Legeerklæring

2.      Passfoto

3.      Kopi av førarkort dersom ein søkjer løyve som førar

Kva kommune skal søknaden sendast til?

Søknaden skal sendast til kommunen du er busett i. Dersom du er busett ein annan stad enn du er folkeregistrert bør du forklare valet av kommune i søknaden, evt. i eige brev.

Dersom du er busett i Sande kommune sendast søknaden/vedlegga til:

Sande kommune

Rønnebergplassen 17

6084 Larsnes